Kevredigezh Vrezhon : 4 raktres

Krouiñ ur gumuniezh hag ur gevredigezh vrezhon ha brezhonek eo pal ar Gevredigezh Vrezhon. 4 raktres hon eus a-benn da seveniñ ar pal-se :

1.sevel ur rolllevr, ennañ renablet tud micher-ha-micher pe hervez o obererezh kevredigezhel, p’o deus un dalvoudegezh kevredigezhel foran. Dre se e c’hallfe pep hini, da skouer, kavout ur mezeg, ur breutaer, ur c’harrdi pe un tredanour a yafe ganto e brezhoneg. Pezh spletus evit ar vevezerion eta. E 1995 e voe savet ul “Levrig” (adembannet abaoe) gant ur gevredigezh dezhi an hevelep anv, o renabliñ kement obererezh a sell sevenadur Breizh e Treger ha Goueloù, e brezhoneg pe get. Gallout a reer keñveriañ hon embregadenn gant se, nemet ez eo pal hol Levrig deomp-ni renabliñ kement obererezh kevredigezhel a zo e brezhoneg hepken, ha ne sellont ket dre ret sevenadur Breizh. Ma pleustrit ur vicher dezhi un dalvoudegezh kevredigezhel, pe ma anavezit tud a seurt-se, kemennit deomp hag-eñ oc’h a-du da vezañ lakaet war seurt roll, pe komzit dezho eus an intrudu-se ha roit deomp da anvavezout o daveennoù.

2.sevel ur gevredigezh bevezerion, dezhi da gefredi bodañ bevezerion d’o sevel evel “stroll pouezañ” (pe lobby) armerzhel a-benn pouezañ war an embregerezhioù d’o lakaat da aotren o bevezerion da gaout kement gwazerezh en o yezh, ha dre se ivez eta da c’hoprañ brezhonegerion. Ret eo kendrec’hiñ an embregerion e c’hall kement-se bezañ spletus evit o aferioù, ha dre-se tennañ diouto ar muiañ ma c’hallimp.

3.sevel ur “bank intruduioù”, dezhañ da bal kreizennañ fichennoù hiniennel tud merket ganto o obererezhioù kevredigezhel pe dudi. Da c’houde e vefe strobet an hiniennoù-se dre obererezhioù kumun, ha klasket neuze sevel kevredigezhioù arbennik. Lakaomp, da skouer, e vefe kavet ha lakaet a-gevret tud a-walc’h dezho an hevelep dedenn evit ar verdeadurezh, evit ar c’hoari echedoù, pe evit ar skoazell d’ar re ziloj pe d’ar glañvourion. Tu vefe neuze da sevel aozaodurioù arbennik a rafe kement-se e brezhoneg.

4.sevel ur gevredigezh tiegezhioù, dezhi da bal kevreañ tiegezhioù hollvrezhonek d’o harpañ da ren o buhez e brezhoneg ha da eskemm etrezo. Er gêr eo hepken e c’hallo bugale piaouañ ar brezhoneg evel o yezh naturel, ha n’eo ket evel “estren” ha desket dre heg ur wezh erru er skol hepken. Un eskemm etre tiegezhioù hollvrezhonek a c’hallfe lakaat ar vugale, a-raok bezañ beuzet er gevredigezh c’hallek, da c’hoari a-gevret en o yezh ent-naturel. Ar skolioù –ken pouezus ma ’z int– ne c’hallont bezañ nemet un heuliad d’ur vuhez vrezhonek kent. Arnodoù kevredigezhioù a seurt-se zo bet endeo, pe a spered kristen (Emglev an Tiegezhioù er bloavezhioù ’50), pe a spered lik (Ar Brezhoneg Er Ger, er bloavezhioù ’70). Ret eo kenderc’hel gant o ervenn, zoken ma n’o deus ket graet kement a verzh o defe gallet.

Kevread ar frammoù-se –ha n’eo ket obererezhioù diliamm kenetrezo– a vefe eta ar Gevredigezh Vrezhon. Mard oc’h deuriet gant ar raktresoù-se, kit an darempred ganeomp o kas ur valad da : kevredigezhvrezhon@yahoo.ie

Kemenn da skignañ mar plij !